മലിനജലം കുടിച്ചതിനെത്തുടർന്ന് ഇൻഡോറിൽ ആകെ 9 പേർ മരിച്ചു. ഇന്ത്യയിലെ ഏറ്റവും വൃത്തിയുള്ള നഗരമായി അംഗീകരിക്കപ്പെട്ട ഇൻഡോർ നിലവിൽ 1,400-ലധികം താമസക്കാരെ ബാധിച്ച ഗുരുതരമായ ആരോഗ്യ അടിയന്തരാവസ്ഥയെ നേരിടുകയാണ്. എൻഡിടിവി റിപ്പോർട്ട് പ്രകാരം, ഡിസംബർ പകുതി മുതൽ ഭഗീരഥപുരയിൽ പൈപ്പ് വെള്ളം കുടിച്ച താമസക്കാർക്ക് കഠിനമായ വയറിളക്കം റിപ്പോർട്ട് ചെയ്തിട്ടുണ്ട്.
ഒരാഴ്ചയ്ക്കുള്ളിൽ രോഗബാധിതരുടെ എണ്ണം കുത്തനെ ഉയരുകയും, ഛർദ്ദി, ഓക്കാനം, പനി, തളർച്ച തുടങ്ങിയ മറ്റ് ഗ്യാസ്ട്രോ ഇന്റസ്റ്റൈനൽ ലക്ഷണങ്ങൾ കാണപ്പെടുകയും ചെയ്തു. പ്രധാന സപ്ലൈ പൈപ്പ് ലൈനിലെ ചോർച്ച കാരണം ഭഗീരഥപുരയിൽ നിന്ന് ശേഖരിച്ച ജലസാമ്പിളുകൾ മലിനമായതാണ് ഇതിന് കാരണമെന്ന് ഇൻഡോർ ചീഫ് മെഡിക്കൽ ആൻഡ് ഹെൽത്ത് ഓഫീസർ ഡോ. മാധവ് പ്രസാദ് ഹസാനി അറിയിച്ചു. നിലവിൽ ഈ പ്രദേശം രോഗവ്യാപനത്തിന്റെ കേന്ദ്രമായി മാറിയിരിക്കുകയാണ്.
ആഗോളതലത്തിൽ ഇപ്പോഴും ആശങ്കയുണ്ടാക്കുന്ന ഒരു വലിയ ആരോഗ്യപ്രശ്നമാണ് ജലമലിനീകരണം. നേരത്തെ ഡിസംബറിൽ ഡൽഹിയിലെ ഭൂഗർഭജലത്തിൽ വിഷലിപ്തമായ രാസവസ്തുക്കളുടെ ഉയർന്ന സാന്നിധ്യം കണ്ടെത്തിയിരുന്നു. ലോകാരോഗ്യ സംഘടനയുടെ (WHO) അഭിപ്രായത്തിൽ, സുരക്ഷിതമല്ലാത്ത വെള്ളം കുടിക്കുന്നത് ബാക്ടീരിയൽ ഗ്യാസ്ട്രോഎൻറൈറ്റിസ്, കോളറ, ടൈഫോയ്ഡ്, ഡിസൻട്രി (അതിസാരം) തുടങ്ങിയ രോഗങ്ങളിലേക്ക് നയിക്കാം. ഇവ ദുർബലരായ ജനവിഭാഗങ്ങളിൽ മരണത്തിന് വരെ കാരണമായേക്കാം. അതിനാൽ, മലിനജലം കുടിക്കുന്നതിലൂടെയുള്ള അപകടസാധ്യതകൾ കുറയ്ക്കുന്നതിന് ജലശുദ്ധീകരണം അത്യാവശ്യമായ ഒരു ഘട്ടമാണ്.
വീട്ടിൽ പരീക്ഷിക്കാവുന്ന ജലശുദ്ധീകരണ രീതികൾ
കാഴ്ചയിൽ ശുദ്ധമെന്ന് തോന്നുന്ന വെള്ളത്തിൽ പോലും രോഗാണുക്കളും രാസവസ്തുക്കളും മലിനീകരണ വസ്തുക്കളും ഉണ്ടായേക്കാം. ഇവ നീക്കം ചെയ്യുന്നതിലൂടെ സുരക്ഷിതമായ കുടിവെള്ളം ഉറപ്പാക്കാൻ സാധിക്കും.
- തിളപ്പിക്കുക ഏറ്റവും ലളിതവും ഫലപ്രദവുമായ മാർഗ്ഗങ്ങളിലൊന്നാണ് വെള്ളം തിളപ്പിക്കുക എന്നത്. ഇത് മിക്കവാറും എല്ലാ ബാക്ടീരിയകളെയും വൈറസുകളെയും പരാദങ്ങളെയും നശിപ്പിക്കുന്നു. ഫലപ്രദമായ ഫലത്തിനായി വെള്ളം കുറഞ്ഞത് ഒന്നുമുതൽ മൂന്ന് മിനിറ്റ് വരെ നന്നായി തിളപ്പിക്കുക. തണുത്ത ശേഷം മാത്രം ഉപയോഗിക്കുക.
- വാട്ടർ പ്യൂരിഫയറുകൾ: ആധുനിക പ്യൂരിഫയറുകൾ പലപ്പോഴും RO+UV+UF തുടങ്ങിയ സങ്കേതങ്ങൾ സംയോജിപ്പിച്ചാണ് പ്രവർത്തിക്കുന്നത്:
പ്രീ-ഫിൽട്ടറുകൾ (Pre-filters): പൊടിപടലങ്ങൾ, ക്ലോറിൻ, ദുർഗന്ധം എന്നിവ നീക്കം ചെയ്യുന്നു.
RO മെംബ്രേൻ (RO Membrane): ഹെവി മെറ്റലുകൾ, രാസവസ്തുക്കൾ, സൂക്ഷ്മാണുക്കൾ എന്നിവ നീക്കം ചെയ്യുന്നു.
UV ചേംബർ (UV Chamber): അൾട്രാവയലറ്റ് രശ്മികൾ ഉപയോഗിച്ച് രാസവസ്തുക്കൾ ഇല്ലാതെ തന്നെ ബാക്ടീരിയകളെയും വൈറസുകളെയും നശിപ്പിക്കുന്നു.
UF ഫിൽട്ടർ (UF Filter): വെള്ളത്തിന് കൂടുതൽ തെളിമ നൽകുന്നു.
മിനറലൈസറുകൾ: ചെമ്പ് പോലുള്ള ഗുണകരമായ ധാതുക്കൾ ചേർക്കാനോ രുചി മെച്ചപ്പെടുത്താനോ സഹായിക്കുന്നു.
- ആക്ടിവേറ്റഡ് ചാർക്കോൾ (Activated Charcoal) : വെള്ളത്തിലെ ക്ലോറിൻ, അവശിഷ്ടങ്ങൾ, ചില ലോഹങ്ങൾ എന്നിവ നീക്കം ചെയ്യാനും രുചി മെച്ചപ്പെടുത്താനും ഇത് സഹായിക്കും. എന്നാൽ ഇത് ബാക്ടീരിയകളെയോ വൈറസുകളെയോ നശിപ്പിക്കില്ല, അതിനാൽ മറ്റ് ശുദ്ധീകരണ രീതികൾക്കൊപ്പം വേണം ഇത് ഉപയോഗിക്കാൻ. വീട്ടിൽ ഇത് ഉപയോഗിക്കുന്നതിനായി, ആക്ടിവേറ്റഡ് ചാർക്കോൾ ഒരു തുണിയിലോ കണ്ടെയ്നറിലോ വച്ച് അതിലൂടെ വെള്ളം അരിച്ചെടുക്കുക.
- രാസ അണുനശീകരണം (Chemical Disinfection) ക്ലോറിൻ അല്ലെങ്കിൽ അയോഡിൻ തുടങ്ങിയ രാസവസ്തുക്കൾ ഉപയോഗിച്ച് വെള്ളം അണുവിമുക്തമാക്കാം. കുറച്ച് തുള്ളി ക്ലോറിൻ ബ്ലീച്ചോ അയോഡിനോ ചേർത്ത് ഇളക്കിയ ശേഷം 30 മിനിറ്റ് കഴിഞ്ഞ് ഉപയോഗിക്കുക. ഇത് പല രോഗാണുക്കളെയും നശിപ്പിക്കുമെങ്കിലും വെള്ളത്തിന് ഒരു പ്രത്യേക രുചി നൽകിയേക്കാം. ആരോഗ്യപ്രശ്നങ്ങളുള്ളവർ ഡോക്ടറുടെ നിർദ്ദേശപ്രകാരം മാത്രം ഈ രീതി പരീക്ഷിക്കുക.
- സൗരോർജ്ജ ജല അണുനശീകരണം (SODIS) സൗകര്യങ്ങൾ കുറഞ്ഞ ഇടങ്ങളിൽ പരീക്ഷിക്കാവുന്ന ചെലവ് കുറഞ്ഞ രീതിയാണിത്. സുതാര്യമായ പ്ലാസ്റ്റിക് കുപ്പികളിൽ വെള്ളം നിറച്ച് ആറ് മണിക്കൂർ നേരിട്ട് സൂര്യപ്രകാശത്തിൽ വയ്ക്കുക (മേഘാവൃതമായ കാലാവസ്ഥയാണെങ്കിൽ രണ്ട് ദിവസം വരെ വയ്ക്കണം). സൂര്യപ്രകാശത്തിലെ രശ്മികൾ വെള്ളത്തിലെ രോഗാണുക്കളെ നശിപ്പിക്കാൻ സഹായിക്കും.
ആരോഗ്യവും ക്ഷേമവും നിലനിർത്താൻ ശുദ്ധമായ കുടിവെള്ളം അത്യന്താപേക്ഷിതമാണ്. നിങ്ങളുടെ പ്രദേശത്തെ ജലത്തിന്റെ ഗുണനിലവാരം അനുസരിച്ച് ഇതിൽ ഒന്നോ അതിലധികമോ രീതികൾ സംയോജിപ്പിച്ച് ഉപയോഗിക്കാവുന്നതാണ്. പടർന്നുപിടിക്കുന്ന രോഗങ്ങളെ തടയാൻ ശുദ്ധീകരിക്കാത്ത വെള്ളം നേരിട്ട് കുടിക്കുന്നത് ഒഴിവാക്കുക.
