ചില വിശേഷങ്ങൾ അത്രമേൽ പ്രത്യേകതയുള്ള രീതിയിൽ തന്നെ ലോകത്തെ അറിയിക്കണം. സ്നേഹത്തിന്റെയും ഓർമ്മകളുടെയും പുതിയ തുടക്കത്തിന്റെയും സ്പർശമുള്ള ഒരു എഐ (AI) വീഡിയോയിലൂടെ തന്റെ ഗർഭകാല വാർത്ത പങ്കുവെച്ചിരിക്കുകയാണ് യുകെയിലെ ഒരു മലയാളി യുവതി. സ്കോട്ട്ലൻഡിൽ താമസിക്കുന്ന മലയാളി ദമ്പതികളായ ഷെറിനും ജെറിനും തങ്ങളുടെ ജീവിതയാത്രയെ സാങ്കേതികവിദ്യയുടെ സഹായത്തോടെ പുനരാവിഷ്കരിച്ച രീതി ഇപ്പോൾ സോഷ്യൽ മീഡിയയിൽ തരംഗമാവുകയാണ്.
വീഡിയോയിൽ ദമ്പതികൾ സോഫയിലിരുന്ന് തങ്ങളുടെ ജീവിതകഥ പറയുന്ന എഐ ചിത്രം കാണുന്നത് കാണാം. സ്കൂൾ കാലഘട്ടം, വിവാഹം, ആദ്യമായി വീട് വാങ്ങിയത്, വർഷങ്ങളായി പരസ്പരം നൽകിയ ജന്മദിന സർപ്രൈസുകൾ എന്നിങ്ങനെ അവരുടെ ജീവിതത്തിലെ ഓരോ സുപ്രധാന ഘട്ടങ്ങളും ഒന്നിനുപുറകെ ഒന്നായി സ്ക്രീനിൽ തെളിയുന്നു.
വീഡിയോയുടെ അവസാനത്തിലാണ് ഏറ്റവും വലിയ ആ സർപ്രൈസ് എത്തുന്നത്. എഐ വീഡിയോയിലെ കഥാപാത്രം ഒരു പ്രെഗ്നൻസി ടെസ്റ്റ് കിറ്റ് കാണിക്കുന്നു, തൊട്ടുപിന്നാലെ യഥാർത്ഥ ജീവിതത്തിലും ഷെറിൻ ആ സർപ്രൈസ് ജെറിന് മുന്നിൽ വെളിപ്പെടുത്തുന്നു. സന്തോഷം സഹിക്കാനാവാതെ ജെറിൻ ഷെറിനെ കെട്ടിപ്പിടിക്കുകയും ചുംബിക്കുകയും ചെയ്യുന്നത് വീഡിയോയിലുണ്ട്. തങ്ങളുടെ ജീവിതത്തിലെ “ഏറ്റവും മധുരമുള്ള അധ്യായം” എന്നാണ് അവർ ഈ നിമിഷത്തെ വിശേഷിപ്പിച്ചത്.
ഒരു പ്രൊഫഷണൽ എഡിറ്ററുടെ സഹായത്തോടെയാണ് ഈ വീഡിയോ തയ്യാറാക്കിയതെന്ന് ഷെറിൻ പറഞ്ഞു. തന്റെ ജീവിതകഥകളും ചിത്രങ്ങളും നൽകി കൃത്യമായ ചർച്ചകൾക്ക് ശേഷമാണ് ഈ മനോഹരമായ ഔട്ട്പുട്ട് ലഭിച്ചതെന്ന് അവർ വെളിപ്പെടുത്തി.
‘sherin_jerin_’ എന്ന ഇൻസ്റ്റാഗ്രാം പേജിലൂടെ പങ്കുവെച്ച വീഡിയോ ഇതിനോടകം 17 ദശലക്ഷത്തിലധികം (1.7 കോടി) ആളുകളാണ് കണ്ടത്. “അപരിചിതരായ നിങ്ങൾക്ക് വേണ്ടി ഞാൻ കരഞ്ഞുപോയി, അഭിനന്ദനങ്ങൾ”, “എന്ത് മനോഹരമായ വീഡിയോ ആണിത്” എന്നിങ്ങനെ പോകുന്ന കമന്റുകളാൽ നിറയുകയാണ് പോസ്റ്റ്. ഗർഭസ്ഥ ശിശുവിനെ വരവേൽക്കാൻ തയ്യാറെടുക്കുന്ന ഈ ദമ്പതികളെ ‘സൂപ്പർ ഹീറോകൾ’ എന്നാണ് സോഷ്യൽ മീഡിയ വിശേഷിപ്പിക്കുന്നത്.
