ഇന്ത്യ പാക്കിസ്ഥാൻ സംഘർഷത്തിനിടെ നിയന്ത്രണ രേഖയ്ക്ക് സമീപം നിലത്തുപതിച്ച പൊട്ടാത്ത മിസൈലുമായി ഫോട്ടോകളും വീഡിയോകളും ചിത്രീകരിക്കുന്ന യുവാക്കളുടെ വീഡിയോയാണ് ഇപ്പോൾ പഞ്ചാബിൽ നിന്നു പുറത്തുവരുന്നത്.
അവശിഷ്ടങ്ങൾ ഉൾപ്പെടെയുള്ള ഇത്തരം സ്ഫോടക വസ്തുക്കളിൽ സ്പർശിക്കുന്നതോ കൈകാര്യം ചെയ്യുന്നതോ അപകടത്തിൽ കലാശിക്കുമെന്ന് അധികാരികൾ മുന്നറിയിപ്പ് നൽകുന്നതിനിടയിലാണ് ചിത്രങ്ങൾ വൈറലായത്.
അവശിഷ്ടങ്ങൾക്കൊപ്പം നിരവധി ഫോട്ടോകളും വീഡിയോകളും പകർത്തുന്ന പഞ്ചാബ് മേഖലയിൽ നിന്നുള്ളവരെന്ന് വിശ്വസിക്കപ്പെടുന്ന പുരുഷന്മാരെയാണ് വൈറൽ വീഡിയോകളിൽ കാണുന്നത്. എന്നാൽ ഇത്തരം പ്രവർത്തനങ്ങൾ അപകടകരമാണെന്നും സ്ഫോടകവസ്തു തൊടരുതെന്നും വീഡിയോയിൽ ആളുകൾ പറയുന്നത് കേൾക്കാം.
മാധ്യമപ്രവർത്തകനായ ഗഗൻദീപ് സിംഗാണ് വീഡിയോ പങ്കിട്ടത്. “ഇന്ത്യയും പാകിസ്ഥാനും തമ്മിലുള്ള യുദ്ധ സംഘർഷങ്ങൾക്കിടയിൽ നിയന്ത്രണ രേഖയിലെ പഞ്ചാബ് പ്രദേശത്തിന് സമീപം പതിച്ച മിസൈൽ. ഇത്തരത്തിലുള്ള സ്ഫോടക വസ്തുക്കളിൽ തൊടുന്നത് ഒഴിവാക്കുക, അത് ജീവൻ നഷ്ടപ്പെടാൻ ഇടയാക്കും” എന്ന് കുറിച്ചുകൊണ്ടാണ് വീഡിയോ പങ്കുവെച്ചിരിക്കുന്നത്.
ഒരു തുറന്ന് പ്രദേശത്ത് പൊട്ടിത്തെറിക്കാത്ത മിസൈൽ രണ്ട് പേർ പിടിച്ചുകൊണ്ടു നിൽക്കുന്നതാണ് വീഡിയോയിൽ കാണുന്നത്. വീഡിയോയിൽ കാണുന്ന മറ്റൊരു യുവാവ് മിസൈൽ കൈകളിൽ എടുക്കാൻ ശ്രമിക്കുന്നതും കാണാം. തുടർന്ന് മിസൈൽ പിടിച്ച് യുവാവ് ക്യാമറയ്ക്ക് പോസ് ചെയ്ത് പുഞ്ചിരിക്കുന്നതാണ് കാണുന്നത്. പൊട്ടിത്തെറിക്കാത്ത മിസൈലിൻ്റെ അടുത്ത് നിൽക്കുകയും വീഡിയോ എടുക്കുകയും പൊട്ടിച്ചിരിക്കുകയും ചെയ്യുന്ന യുവാക്കളെയാണ് വീഡിയോയുടെ ഒടുവിൽ കാണുന്നത്.
നിരവധി ആളുകളാണ് കമന്റിൽ രസകരമായ അഭിപ്രായങ്ങളുമായി രംഗത്തെത്തിയത്. തമാശ മാറ്റിവെക്കാനും തത്സമയ വെടിമരുന്ന് ഉപയോഗിച്ച് കളിക്കരുതെന്നും അഭ്യർത്ഥിച്ചു.
