ഇരട്ട ഒളിമ്പിക് മെഡല്‍ ജേതാവും സ്റ്റാര്‍ ജാവലിന്‍ ത്രോ താരവുമായ നീരജ് ചോപ്ര വിവാഹിതനായി. തികച്ചും സ്വകാര്യമായി നടത്തിയ ചടങ്ങിന്റെ ചിത്രങ്ങള്‍ ഇപ്പോള്‍ സാമൂഹ്യമാധ്യമങ്ങളില്‍ വൈറലാണ്.
ഞായറാഴ്ച ഇന്‍സ്റ്റാഗ്രാമില്‍ എത്തിയ നീരജ്, ഹൃദയസ്പര്‍ശിയായ ഒരു കുറിപ്പോടെ ഈ വാര്‍ത്ത ആരാധകരുമായി പങ്കിട്ടു. ”എന്റെ കുടുംബത്തോടൊപ്പം ജീവിതത്തിന്റെ പുതിയ അധ്യായം ആരംഭിക്കുന്നു. ഞങ്ങളെ ഈ നിമിഷത്തിലേക്ക് കൊണ്ടുവന്ന ഓരോ അനുഗ്രഹത്തിനും നന്ദിയുണ്ട്. സ്‌നേഹത്താല്‍ ബന്ധിക്കപ്പെട്ടിരിക്കുന്നു, സന്തോഷത്തോടെ എന്നെന്നേക്കുമായി.” നീരജ് അടിക്കുറിപ്പ് ഇട്ടു.
തന്റെ ജീവിതത്തിന്റെ പുതിയ പങ്കാളിയെ വെളിപ്പെടുത്തിക്കൊണ്ട് ഇന്‍സ്റ്റാഗ്രാമില്‍ നിരവധി ചിത്രങ്ങള്‍ പങ്കുവെച്ചു. അത്ലറ്റിന്റെ അമ്മാവന്‍ പറയുന്നതനുസരിച്ച് നീരജിന്റെ ഭാര്യ ഹിമാനി ഇപ്പോള്‍ അമേരിക്കയില്‍ വിദ്യാര്‍ത്ഥിനിയാണ്. അടുത്ത സുഹൃത്തുക്കളും കുടുംബാംഗങ്ങളും മാത്രമായി പങ്കെടുത്ത സ്വകാര്യ ചടങ്ങിലാണ് ഇരുവരും വിവാഹിതരായത്. വിവാഹത്തിന് റിസപ്ഷന്‍ പാര്‍ട്ടിയും ഉണ്ടാകുമെന്ന് നീരജിന്റെ അമ്മാവനും സ്ഥിരീകരിച്ചു.
ഹരിയാനയിലെ ലാര്‍സൗലി സ്വദേശിയായ നീരജ് ചോപ്രയുടെ ഭാര്യ ഹിമാനി മോര്‍ പാനിപ്പത്തിലെ ലിറ്റില്‍ ഏഞ്ചല്‍സ് സ്‌കൂളില്‍ സ്‌കൂള്‍ വിദ്യാഭ്യാസം പൂര്‍ത്തിയാക്കി. വിദേശത്ത് വിദ്യാഭ്യാസം ചെയ്യുന്നതിനായി പോകുന്നതിന് മുമ്പ്, ഡല്‍ഹി സര്‍വകലാശാലയിലെ മിറാന്‍ഡ ഹൗസില്‍ നിന്ന് പൊളിറ്റിക്കല്‍ സയന്‍സിലും ഫിസിക്കല്‍ എജ്യുക്കേഷനിലും ബിരുദം നേടി.
മക്കോര്‍മാക് ഐസെന്‍ബര്‍ഗ് സ്‌കൂള്‍ ഓഫ് മാനേജ്മെന്റില്‍ നിന്ന് സ്പോര്‍ട്സ് മാനേജ്മെന്റിലും അഡ്മിനിസ്ട്രേഷനിലും സയന്‍സില്‍ ബിരുദാനന്തര ബിരുദം ചെയ്യുന്നു. സൗത്ത് ഈസ്റ്റേണ്‍ ലൂസിയാന യൂണിവേഴ്‌സിറ്റിയിലെ ഒരു ടെന്നീസ് കളിക്കാരി കൂടിയായ അവര്‍ ഫ്രാങ്ക്‌ലിന്‍ പിയേഴ്‌സ് യൂണിവേഴ്‌സിറ്റിയില്‍ പാര്‍ട്ട് ടൈം അസിസ്റ്റന്റ് കോച്ചായി പ്രവര്‍ത്തിച്ചിട്ടുണ്ട്. നിലവില്‍, അവര്‍ ആംഹെര്‍സ്റ്റ് കോളേജിലെ ടെന്നീസ് ടീമിന്റെ പരിശീലക കൂടിയാണ്.
