ഒരു ത്രില്ലര്‍ സിനിമ കാണുന്ന ആകാംക്ഷയുണര്‍ത്തുന്ന രംഗങ്ങളാണ് അറ്റ്ലാന്റ പോലീസ് ഡിപ്പാര്‍ട്ട്‌മെന്റ് അടുത്തിടെ പുറത്തുവിട്ടത്. വീഡിയോയില്‍ പണം പരിശോധിക്കുന്ന ബിസിനസ്സിന്റെ മാനേജര്‍ കൗണ്ടറിനു പിന്നില്‍ നടക്കുന്നതാണ് ആദ്യം കാണാനാകുന്നത്. നിമിഷങ്ങള്‍ക്കുശേഷം സിനിമകളില്‍ കാണുന്ന പോലെ മുകളില്‍ നിന്ന് സീലിംഗിന്റെ അവശിഷ്ടങ്ങള്‍ താഴെ വീഴുന്നതും അതിലൂടെ ഒരു പുരുഷന്‍ മുകളില്‍നിന്ന് സീലിംഗിലൂടെ താഴേക്ക് വയറുകളില്‍ തൂങ്ങി ഇറങ്ങുന്നത് കാണാം.
തുടര്‍ന്ന് പുരുഷന്‍ പേടിച്ച് പിന്നോട്ടോടുന്ന സ്ത്രീയെ കടന്നുപിടിക്കുന്നതിനിയില്‍ അവര്‍ മറിഞ്ഞ് നിലത്തുവീഴുന്നു. ഇതിനിടെ രണ്ടാമനും സീലിംഗില്‍നിന്ന് തൂങ്ങിയിറങ്ങുന്നുണ്ട്. പിന്നീട് രണ്ടു പ്രതികളും ചേര്‍ന്ന് പുറകിലെ മുറിയില്‍ ഒരു സേഫ് തുറക്കാന്‍ സ്ത്രീയോട് നിര്‍ദ്ദേശിക്കുന്നതായി ദൃശ്യങ്ങള്‍ കാണിക്കുന്നു. തുടര്‍ന്ന് മോഷ്ടാക്കള്‍ പണം ബാഗുകളില്‍ നിറയ്ക്കുന്നു. അവര്‍ ഏകദേശം 150,000 ഡോളറുകള്‍ മോഷ്ടിച്ചു, തുടര്‍ന്ന് സ്ത്രീയെ കുളിമുറിയില്‍ പൂട്ടിയിട്ട് രക്ഷപ്പെട്ടു.
സംഭവസ്ഥലത്ത് നിന്ന് ഓടിപ്പോകുന്നതിന് മുമ്പ്, സംശയിക്കപ്പെടുന്നവരില്‍ ഒരാള്‍ പിന്‍വാതിലിലൂടെ പുറത്തുകടക്കുമ്പോള്‍ തന്റെ സ്‌കീ മാസ്‌കിന്റെ ഭൂരിഭാഗവും ഉയര്‍ത്തുന്നു, അവിടെ പുറത്തുനില്‍ക്കുന്ന ഒരു വഴിയാത്രക്കാരന്‍ അവനെ കാണുന്നുണ്ട്. യുഎസ്എ ടുഡേ പ്രകാരം അറ്റ്ലാന്റ ചെക്ക് കാഷേഴ്സില്‍ സെപ്റ്റംബര്‍ 3 നാണ് കവര്‍ച്ച നടന്നത്. രാവിലെ എട്ടരയോടെയാണ് പോലീസ് സ്ഥലത്തെത്തിയത്.
30 വയസ്സുള്ള, ഏകദേശം 6 അടി ഉയരമുള്ള, കറുത്ത പുരുഷന്‍ എന്നാണ് ആദ്യത്തെ പ്രതിയെ വിശേഷിപ്പിച്ചത്. 5 അടി 8 ഇഞ്ച് ഉയരവും മെലിഞ്ഞ ശരീരവും ഉള്ള കറുത്ത നിറമുള്ള പുരുഷനായിരുന്നു രണ്ടാമത്തെ പ്രതി. രണ്ടാമത്തെ പ്രതിക്ക് പ്രായം കണക്കാക്കിയിട്ടില്ല. അജ്ഞാതനായ മൂന്നാമന്‍ ഓടിച്ച, പഴയ രണ്ട് ഡോര്‍ പിക്കപ്പ് ട്രക്കിലാണ് പ്രതികള്‍ രക്ഷപ്പെട്ടത്. നിരീക്ഷണ ഫൂട്ടേജുകളിലാണ് ഒരു കടയില്‍ നിന്നും 150,000 ഡോളര്‍ തട്ടിയെടുത്ത മുഖംമൂടി ധരിച്ച മോഷ്ടാക്കള്‍ കുടുങ്ങിയത്.
