ഇക്വഡോറിനും പരാഗ്വേയ്ക്കുമെതിരായ ലോകകപ്പ് യോഗ്യതാ മത്സരങ്ങള്‍ മുന്നില്‍ നില്‍ക്കേ തന്റെ ടീമില്‍ നിന്നും സൂപ്പര്‍താരങ്ങളായ നെയ്മറേയും റയല്‍മാഡ്രിഡ് താരം റോഡ്രിഗോയെയും യോഗ്യതാമത്സരങ്ങളില്‍ നിന്നും ഒഴിവാക്കി പുതിയ പരിശീലകന്‍ കാര്‍ലോസ് ആന്‍സലോട്ടി. തന്റെ ടീം പ്രധാനമായും ആശ്രയിക്കുന്നത് ഫിറ്റ്‌നസും ഫോമും ആണെന്നും ആ പട്ടികയില്‍ ഇരുവരും ഇല്ല എന്നും വ്യക്തമാക്കി.
റയല്‍മാഡ്രിഡിന്റെ ഈ സീസണ്‍ പൂര്‍ത്തിയായതിന് പിന്നാലെയാണ് ആന്‍സലോട്ടി ബ്രസീല്‍ ടീമിന്റെ പരിശീലകനായി ചുമതലയേറ്റത്. സൂപ്പര്‍താരങ്ങളെ തള്ളിക്കൊണ്ടാണ് ബ്രസീല്‍ മുഖ്യ പരിശീലകനെന്ന നിലയില്‍ കാര്‍ലോ ആന്‍സലോട്ടി തന്റെ പ്രവര്‍ത്തനത്തിന് ധീരമായ തുടക്കം കുറിച്ചിരിക്കുന്നത്. ടീം സ്ഥിരത കണ്ടെത്താന്‍ പാടുപെടുമ്പോള്‍ ക്ലബ് തലത്തില്‍ പൂര്‍ണ്ണമായും പൊരുത്തപ്പെടുന്നവരും പതിവായി സംഭാവന ചെയ്യുന്നവരുമായ കളിക്കാരില്‍ ശ്രദ്ധ കേന്ദ്രീകരിക്കാന്‍ പരിശീലകന്‍ എടുത്ത തീരുമാനത്തിന്റെ ഭാഗമാണിത്.
കഴിഞ്ഞ ഒക്ടോബറില്‍ അന്താരാഷ്ട്ര ഡ്യൂട്ടിക്കിടെ കാല്‍മുട്ടിനേറ്റ ഗുരുതരമായ പരിക്കില്‍ നിന്ന് കരകയറിയ ശേഷം നെയ്മര്‍ സാന്റോസിനായി തിരിച്ചെത്തിയെങ്കിലും, ദേശീയടീമിന് ഉടന്‍ അദ്ദേഹത്തെ വേണ്ടെന്ന് ആന്‍സലോട്ടി തീരുമാനിച്ചു. നെയ്മറെ ഒഴിവാക്കിയത് പുരികം ഉയര്‍ത്തി യെങ്കിലും, അദ്ദേഹം ബ്രസീലിന്റെ ദീര്‍ഘകാല പ്രോജക്റ്റിന്റെ അവിഭാജ്യ ഘടകമായി തുടരുമെന്ന് ആന്‍സെലോട്ടി വ്യക്തമായിരുന്നു. 2026 ലോകകപ്പ് ആസന്നമായിരിക്കെ, 32-കാരന്റെ പൂര്‍ണ ഫിറ്റ്നസിലേക്കുള്ള തിരിച്ചുവരവ് വളരെ പ്രധാനമാണെന്നും പറയുന്നു.
തിരിച്ചുവിളിച്ച കളിക്കാരില്‍ പരിചയസമ്പന്നരായ കാസെമിറോയും റിച്ചാര്‍ലിസണും ഉള്‍പ്പെടുന്നു, ഇരുവരും കഴിഞ്ഞ ഒക്ടോബറിനുശേഷം ബ്രസീലിനായി കളിച്ചിട്ടില്ല. സ്‌ക്വാഡിനെ പുനര്‍നിര്‍മ്മിക്കുമ്പോള്‍ ഉയര്‍ന്നുവരുന്ന പ്രതിഭകളുമായി മുതിര്‍ന്ന നേതൃത്വത്തെ സമന്വയിപ്പിക്കാനുള്ള ആന്‍സലോട്ടിയുടെ ഉദ്ദേശ്യത്തെ അവരുടെ തിരിച്ചുവരവ് പ്രതിഫലിപ്പിക്കുന്നു. ‘ആധുനിക ഫുട്‌ബോളില്‍, നിങ്ങള്‍ മനോഭാവം, പ്രതിബദ്ധത, ത്യാഗം എന്നിവ കൂട്ടിച്ചേര്‍ക്കണം, കാസെമിറോയ്ക്ക് അത് ഉണ്ട്. വിളിക്കപ്പെട്ട പലര്‍ക്കും അത് ഉണ്ട്.’ അദ്ദേഹം കൂട്ടിച്ചേര്‍ത്തു.
അതേസമയം മാഞ്ചസ്റ്റര്‍ യുണൈറ്റഡ് തള്ളുകയും റിയല്‍ ബെറ്റിസിലെ ലോണ്‍ സ്‌പെല്‍ സമയത്ത് തന്റെ ഫോം വീണ്ടെടുക്കുകയും ചെയ്ത ആന്റണിയെ അദ്ദേഹം തിരിച്ചുവിളിച്ചിട്ടുണ്ട്. റാഫിന്‍ഹ, വിന്‍ഷ്യസ് ജൂനിയര്‍ എന്നിവരോടൊപ്പം ആക്രമണ ചുമതലകള്‍ക്കായി നിയോഗിക്കാനാണ് ഉദ്ദേശം. 25 അംഗ സ്‌ക്വാഡില്‍ യുവതാരങ്ങളായ ആന്‍ഡ്രി സാന്റോസ്, എസ്റ്റ്വോ വില്ലിയന്‍ എന്നിവരും ഉള്‍പ്പെടുന്നു.
