ജീവിതശൈലീ രോഗങ്ങൾ അതിവേഗം വർധിച്ചുകൊണ്ടിരിക്കുന്ന ഈ കാലഘട്ടത്തിൽ, 500 രൂപയിൽ താഴെ മാത്രം ചെലവ് വരുന്ന ഒരു ലളിതമായ രക്തപരിശോധനയ്ക്ക് നിങ്ങളുടെ ജീവനും സമ്പാദ്യവും രക്ഷിക്കാൻ സാധിക്കും. ഗുരുതരമായ ആരോഗ്യപ്രശ്നങ്ങളിലേക്കും ലക്ഷക്കണക്കിന് രൂപയുടെ ആശുപത്രി ചെലവുകളിലേക്കും എത്തുന്നതിന് മുൻപ് തന്നെ കരൾ രോഗങ്ങൾ തിരിച്ചറിയാൻ ‘ലിവർ ഫങ്ഷൻ ടെസ്റ്റ്’ സഹായിക്കുമെന്ന് വിദഗ്ധർ ചൂണ്ടിക്കാട്ടുന്നു. ഇന്ത്യയിൽ സംഭവിക്കുന്ന മരണങ്ങളിൽ 18 ശതമാനത്തിലധികം കരൾ രോഗങ്ങൾ മൂലമാണെന്നാണ് കണക്കുകൾ സൂചിപ്പിക്കുന്നത്. അമിതമായ മദ്യപാനം, തെറ്റായ ഭക്ഷണരീതി , ഹെപ്പറ്റൈറ്റിസ് ബി, സി തുടങ്ങിയവയാണ് ഇതിന് പ്രധാന കാരണങ്ങൾ.
കരൾ രോഗങ്ങളുടെ ഏറ്റവും വലിയ അപകടം അവ പ്രാരംഭ ഘട്ടത്തിൽ ലക്ഷണങ്ങൾ കാണിക്കില്ല എന്നതാണ്. മഞ്ഞപ്പിത്തം, വയറിൽ നീർക്കെട്ട്, ആന്തരിക രക്തസ്രാവം തുടങ്ങിയ ലക്ഷണങ്ങൾ പ്രത്യക്ഷപ്പെടുമ്പോഴേക്കും രോഗം ഗുരുതരമായ അവസ്ഥയിൽ എത്തിയിട്ടുണ്ടാകും. രോഗം വല്ലാതെ കൂടിയാൽ ഏകദേശം 20 ലക്ഷം മുതൽ 35 ലക്ഷം രൂപ വരെ ചെലവ് വരുന്ന കരൾ മാറ്റിവെക്കൽ ശസ്ത്രക്രിയ മാത്രമായിരിക്കും ഏക പോംവഴി. ശസ്ത്രക്രിയയ്ക്ക് മുൻപും ശേഷവുമുള്ള പരിശോധനകളും മരുന്നുകളും ഐ.സി.യു ചെലവുകളും കൂടി വരുമ്പോൾ കുടുംബത്തിന് താങ്ങാനാവാത്ത സാമ്പത്തിക ബാധ്യതയായി ഇത് മാറുന്നു.
ഇന്നത്തെ കാലത്ത് മദ്യപിക്കുന്നവർക്ക് മാത്രമല്ല, വ്യായാമമില്ലാത്ത ജീവിതശൈലിയും ഫാസ്റ്റ് ഫുഡ് ശീലവുമുള്ള യുവാക്കൾക്കിടയിലും ‘ഫാറ്റി ലിവർ’ അഥവാ കരളിലെ കൊഴുപ്പ് വർധിക്കുന്ന അവസ്ഥ കണ്ടുവരുന്നുണ്ട്. ഇത് ഹൃദയാഘാതം, പക്ഷാഘാതം എന്നിവയ്ക്കുള്ള സാധ്യതയും വർധിപ്പിക്കുന്നു. അതുകൊണ്ട് തന്നെ വർഷത്തിലൊരിക്കലെങ്കിലും കരൾ പരിശോധന നടത്തുന്നത് ഉചിതമാണ്. പ്രമേഹം, അമിതവണ്ണം, അമിത മദ്യപാനം എന്നിവയുള്ളവർ ഡോക്ടറുടെ നിർദ്ദേശപ്രകാരം കൃത്യമായ ഇടവേളകളിൽ പരിശോധനകൾ നടത്തേണ്ടതുണ്ട്.
500 രൂപയുടെ പരിശോധനയിലൂടെ രോഗം മുൻകൂട്ടി കണ്ടെത്തിയാൽ ജീവിതശൈലിയിലെ മാറ്റങ്ങളിലൂടെയോ ലളിതമായ മരുന്നുകളിലൂടെയോ അത് പൂർണ്ണമായും ഭേദമാക്കാൻ സാധിക്കും. ഇൻഷുറൻസ് കമ്പനികൾ ഇത്തരം പരിശോധനകൾ തങ്ങളുടെ പ്ലാനുകളുടെ ഭാഗമാക്കിയാൽ വലിയൊരു വിഭാഗം ജനങ്ങളെ മാരകമായ രോഗങ്ങളിൽ നിന്നും കടബാധ്യതകളിൽ നിന്നും രക്ഷിക്കാൻ കഴിയുമെന്ന് ആരോഗ്യവിദഗ്ധർ അഭിപ്രായപ്പെടുന്നു. രോഗം വന്നതിനുശേഷം ചികിത്സിക്കുന്നതിനേക്കാൾ മുൻകൂട്ടി തടയുന്നതാണ് ബുദ്ധിയെന്ന് ഈ കണക്കുകൾ നമ്മെ ഓർമ്മിപ്പിക്കുന്നു.
Disclaimer: This content including advice provides generic information only. It is in no way a substitute for a qualified medical opinion. Always consult a specialist or your own doctor for more information. Hashtagonline does not claim responsibility for this information.
