ട്രെയിൻ യാത്രകൾ ഇഷ്ടപെടാത്തതായി അധികമാരും ഉണ്ടാകില്ല. ജനാലയിലൂടെ പച്ചവിരിച്ച് നിൽക്കുന്ന വയലുകൾ കാണുന്നതും ഇളം കാറ്റു വീശുന്നതും നിശബ്‍ദമായ സ്റ്റേഷനുകളിലെ ചൂടുള്ള ചായയും ആസ്വദിച്ചുള്ള സമാധാനപരമായ ട്രെയിൻ യാത്ര ഒരു പ്രത്യേക അനുഭവമാണ് പകരുന്നത്.
എന്നാൽ ഈ ശാന്തതയിൽ നിന്നെല്ലാം, തികച്ചും വ്യത്യസ്തമായ ഒരു യാത്ര വാഗ്ദാനം ചെയ്യുന്ന ഒരു ട്രെയിൻ ഉണ്ട്. പറഞ്ഞുവരുന്നത് 3 കിലോമീറ്റർ വരെ നീളുന്ന, മൗറിറ്റാനിയയിലെ ഇരുമ്പയിര് ട്രെയിനെകുറിച്ചാണ്. ലോകത്തിലെ ഏറ്റവും നീളമേറിയതും ഭാരമേറിയതും അപകടകരവുമായ ട്രെയിനുകളിൽ ഒന്നായാണ് ഇത് അറിയപ്പെടുന്നത്. കത്തുന്ന സഹാറ മരുഭൂമിയിലൂടെ വൻതോതിൽ ഇരുമ്പയിര് കയറ്റി നിർത്താതെ സഞ്ചരിക്കുന്ന ട്രയിനാണ് ഇത്.
പശ്ചിമാഫ്രിക്കയിലെ വിശാലവും വരണ്ടതുമായ രാജ്യമായ മൗറിറ്റാനിയ, ലോകത്തിലെ ഏറ്റവും സമ്പന്നമായ ഇരുമ്പയിര് നിക്ഷേപങ്ങളുടെ കേന്ദ്രമാണ്. ഈ ഖനികൾ നഗരങ്ങളിൽ നിന്നും നാഗരികതയിൽ നിന്നും വളരെ അകലെയുള്ള സഹാറ മരുഭൂമിയിലെ കത്തുന്ന മണലുകൾക്കുള്ളിലാണ് സ്ഥിതിചെയ്യുന്നത്. വിദൂര ഖനന നഗരമായ സോ റാറ്റിൽ നിന്ന് അറ്റ്ലാൻ്റിക് തീരത്തെ തുറമുഖ നഗരമായ നൗദിബൗവിലേക്ക് കനത്ത അയിര് നീക്കാൻ, ഒരു പ്രത്യേക ട്രെയിൻ പിറവിയെടുത്തു, അത് ഉടൻ തന്നെ ഒരു ഇതിഹാസമായി മാറുകയും ചെയ്തു.
ഈ ഇരുമ്പുമായി പറക്കുന്ന രാക്ഷസ ട്രെയിൻ മരുഭൂമിയിലൂടെ 704 കിലോമീറ്ററാണ് സഞ്ചരിക്കുന്നത്. യാത്ര പൂർത്തിയാക്കാൻ ഏകദേശം 14 മണിക്കൂറാണ് ഈ ട്രെയിന് ആവശ്യമായി വരുന്നത്. അനന്തമായ മണൽത്തിട്ടകൾ, സൂര്യപ്രകാശത്തിൽ ചുട്ടുപഴുത്ത സമതലങ്ങൾ, കാറ്റു വീശുന്ന മരുഭൂമികൾ എന്നിങ്ങനെ തോന്നിക്കുന്ന ഭൂപ്രകൃതികളിലൂടെ ഈ ട്രെയിൻ കടന്നുപോകുന്നു.
ഈ ട്രെയിൻ നമുക്ക് അറിയാവുന്ന ട്രെയിനുകൾ പോലെയല്ല. ഇതിന് ഇരിപ്പിടങ്ങളോ കമ്പാർട്ടുമെൻ്റുകളോ എന്തിനു പറയുന്നു മേൽക്കൂര പോലുമില്ല. 200-ലധികം തുറന്ന ചരക്ക് വാഗണുകൾ കൊണ്ടാണ് ഇത് നിർമ്മിച്ചിരിക്കുന്നത്. ഓരോന്നിലും 84 ടൺ ഇരുമ്പയിര് കയറ്റിയാണ് ഇതിന്റെ യാത്ര. പ്രദേശവാസികൾ ഇതിനെ “ട്രെയിൻ ഡു ഡെസേർട്ട്” അഥവാ “മരുഭൂമിയുടെ ട്രെയിൻ” എന്നാണ് വിശേഷിപ്പിക്കുന്നത്. ഇത്രയേറെ കഠിനമായ സാഹചര്യങ്ങൾക്കിടയിലും, ചില മൗറിറ്റാനിയൻ പ്രദേശവാസികൾ ഇപ്പോഴും ഈ ട്രെയിനിൽ ഒരു സൗജന്യ സവാരി നടത്താനായി ആഗ്രഹിക്കാറുണ്ട്.
കത്തുന്ന സൂര്യനിൽ നിന്നും ചുഴറ്റുന്ന മരുഭൂമിയിലെ മണലിൽ നിന്നും രക്ഷനേടാൻ സ്കാർഫുകൾ പൊതിഞ്ഞു അയിരിൻ്റെ മുകളിൽ തന്നെ ഇരുന്നാണ് യാത്രക്കാർ ഇതിൽ സഞ്ചരിക്കുന്നത്. ഇതിനിടയിൽ സ്റ്റേഷനില്ല, ഭക്ഷണമില്ല ലഭ്യമല്ല, വെള്ളമില്ല, എന്തെങ്കിലും അപകടം സംഭവിച്ചാൽ പോലും സഹായിക്കാൻ ആരുമില്ല. എന്നിട്ടും, ആളുകൾ ഇത് ഓടിക്കാൻ തയ്യാറാകുന്നു. കാരണം മൗറിറ്റാനിയയുടെ ചില ഭാഗങ്ങളിൽ, ദീർഘദൂര യാത്രയ്ക്കുള്ള ഏക ലാഭകരമായ യാത്ര മാർഗം ഇത് മാത്രമാണ്.
സായുധ ഗ്രൂപ്പുകൾക്കും അൽ-ഖ്വയ്‌ദ ഉൾപ്പെടെയുള്ള തീവ്രവാദ പ്രവർത്തനങ്ങൾക്കും പേരുകേട്ട പ്രദേശമായ പടിഞ്ഞാറൻ സഹാറ അതിർത്തിക്കടുത്തുള്ള പട്ടണമായ സോ റാറ്റിൽ നിന്നാണ് ട്രെയിൻ യാത്ര ആരംഭിക്കുന്നത്. കയറാനുള്ള ഏറ്റവും സുരക്ഷിതമായ സ്ഥലം ചൗം എന്ന പട്ടണമാണ്. എന്നാൽ അവിടെയും നമ്മൾ നമ്മളെ തന്നെ സൂക്ഷിക്കേണ്ടിവരും. കാരണം എന്തെങ്കിലും സംഭവിച്ചാൽ, സമീപത്ത് ഒരു രക്ഷാസംഘവും കാത്തുനിൽക്കില്ല. വേനൽക്കാലത്ത് താപനില 50 ഡിഗ്രി സെൽഷ്യസിനു മുകളിൽ ഉയരുന്നുതിനാൽ , മണൽക്കാറ്റുകൾ എവിടെയും പ്രത്യക്ഷപ്പെടാം. എന്നിട്ടും, മറ്റൊരു ഗ്രഹം പോലെ തോന്നിക്കുന്ന ഒരു ഭൂപ്രകൃതിയിലൂടെ ട്രെയിൻ ദിവസം തോറും നീങ്ങുന്നു.
1963 മുതലാണ് മൗറിറ്റാനിയ ഇരുമ്പയിര് ട്രെയിൻ ഓടിതുടങ്ങിയത്. ഇത് നിർമ്മിച്ചത് ആളുകൾക്ക് വേണ്ടിയല്ല മറിച്ച് ഭൂമിയിൽ നിന്നു ലഭ്യമാകുന്ന സമ്പത്ത് ഭൂമിയിലെ ഏറ്റവും അപകടകരമായ ഭൂപ്രദേശങ്ങളിലൂടെ കൊണ്ടുപോകാൻ വേണ്ടിയാണ്. ഇന്ന്, ആയിരക്കണക്കിന് ടൺ ലോഹത്തിൻ്റെ ഭാരം വഹിക്കുന്ന ട്രെയിൻ രണ്ടോ അതിലധികമോ ശക്തമായ എഞ്ചിന്റെ സഹായത്തോടെയാണ് നീങ്ങുന്നത്. ഇത്തരത്തിൽ എല്ലാ ദിവസവും, സഹാറയിലൂടെ ഈ ട്രെയിൻ അതിന്റെ ഇതിഹാസ യാത്ര നടത്തികൊണ്ടിരിക്കുന്നു
