താടിയെല്ല് കുടുങ്ങിയതിനെ തുടര്‍ന്ന് വായ അടയ്ക്കാന്‍ കഴിയാത്ത അവസ്ഥയിലായ സോഷ്യൽ മീഡിയ ഇൻഫ്ലുവൻസറായ പെൺകുട്ടിയെ ആശുപത്രിയില്‍ പ്രവേശിപ്പിച്ചു. ജന്ന സിനത്ര എന്ന ഇരുപത്തിയൊന്നുകാരിയ്ക്കാണ് ദുരനുഭവം ഉണ്ടായത്. അലറിവിളിച്ചതോടെ യുവതിയുടെ താടിയെല്ല് കുടുങ്ങുകയായിരുന്നു. തുറന്നുപിടിച്ച വായയുമായി ന്യൂജഴ്‌സിയിലെ ആശുപത്രിയിലേക്കു നടന്നു വരുന്ന യുവതിയില്‍ നിന്നാണ് വിഡിയോ തുടങ്ങുന്നത്.
താടിയെല്ല് കുടുങ്ങിയതിനെ തുടര്‍ന്ന് വായ അടയ്ക്കാന്‍ കഴിയാത്ത അവസ്ഥയിലായി ആശുപത്രിയില്‍ പ്രവേശിപ്പിക്കുന്നതിന്റെ വിഡിയോ യുവതി തന്നെയാണ് സമൂഹമാധ്യമത്തിലൂടെ പങ്കുവച്ചത്. തുടര്‍ന്ന് എന്താണ് സംഭവിച്ചതെന്ന് ഡോക്ടര്‍ ചോദിക്കുന്നതും വിഡിയോയിലുണ്ട്. എന്നാല്‍ യുവതിക്ക് സംസാരിക്കാന്‍ ബുദ്ധിമുട്ട് അനുഭവപ്പെട്ടതിനാല്‍ കൂടെയുണ്ടായിരുന്ന സ്ത്രീയാണ് മറുപടി നല്‍കിയത്. ഒരു മണിക്കൂറായി ജെന്നയ്ക്ക് വായ അടയ്ക്കാനോ സംസാരിക്കാനോ സാധിക്കുന്നില്ലെന്ന് അവര്‍ ഡോക്ടറെ അറിയിച്ചു. തുടര്‍ന്ന് നടത്തിയ പരിശോധനയിലാണ് ശക്തമായ അലര്‍ച്ചയില്‍ ജെന്നയുടെ താടിയെല്ല് കുടുങ്ങിയതാണെന്ന് വ്യക്തമായത്.
”എനിക്കിത് വിശ്വസിക്കാനായില്ല. മരുന്നും നാല് ഡോക്ടര്‍മാരുടെ പരിശ്രമവും ചേര്‍ന്നപ്പോഴാണ് എന്റെ താടിയെല്ല് വീണ്ടും ചലിച്ചത്.” – ജെന്ന സമൂഹമാധ്യമത്തില്‍ കുറിച്ചു. മണിക്കൂറുകള്‍ നീണ്ട ചികിത്സയ്‌ക്കൊടുവിലാണ് തന്റെ താടിയെല്ല് പൂര്‍വസ്ഥിതിയിലായതെന്നും ജെന്ന അറിയിച്ചു
